Time to go back home..

حد الاحباط أحس ... خصوصاً مع نتايج الانتخابات .. اللي فجأة و بقدرة قادر تغيرت وانقلبت الموازين

باجر ... آخر يوم ... حان وقت العودة.. وقت الرحيل، وقت تسفيط الجناط .. و زيادة الاحباط .. أغاني خالد الشيخ بالباكراوند ... قواطي كوكيز مقططة على الطاولة ... جياس (أكياس) شوبنغ مالوت أمس .. أوراق عليها جمل و كلمات ناقصة .. دموع فجأة ... كاكاو تويكس مسفّط مقطوط بين الأوراق (من وينلي تويكس ... لا يكون هذا من يوم الــ ... وييييع)

والله يمّه لو تدرين اني بزهّب جنطتي بنفس يوم السفرة جان علوم !! مالي خلق .. و مريضة .. و النتايج اتمرّض الواحد زيادة ..

الغرفة عفسة ، مادري شأحط بالجنطة او شاخللّي ...

والله يبه لو تدري اني امضيعة جوازي او باجر طيارتي جان علوم بعد "(احم) ترى حتى كرت تليفوني مال الكويت ضايع (حاطلي اياه جوال عشان ماتوهق لي وصلت مطار فرانكفورت أو هيثرو) بعد عمري والله .. لو تدري شكثر ولهت عليك جان سامحتني على كل هذا .. و أدري أنك ولهان علي و على هذرتي .. محّد تافخ راسك غيري! لول

اول ردّة حق الكويت من بين كل المرات اللي رجعت فيهم، تكون ملخبطة او عفسة او حوسة. العادة كل شي زاهب والجنطة مسكرة قبلها بيوم .. حتى لبس المطار مزهّب ... الله يستر و يعديها على خير ... اول مرة اتمنى فيها اني اقعد زيادة شوية ...

الساعة الآن تمام الثالثة فجراً و "فراشة" لا تزال صاحية .. لا نية لها بالنوم ... و بعدين؟؟ شسوي يعني؟؟

و تمر ساعتان.. و يغلب النعاس جفناي اللذان امتلآ بالدموع.. و خالد الشيخ يقول :

حان الوداع و خاطري منك ما طاب *** يا شين لحظات البكا و الوداع
سافر فأمان الله يا أعز الأحبـــــــاب *** باصبر على فرقاك رغم التياعي
يومك بكيت و حدّر الدمع سكـــــّّاب *** دمعك على الوجنات سببّ ضياعي
الله يردك يا بعد كل الأحبــــــــــاب *** و اسعد معاك بلقا و اجتمـــــــــاع

حان الوداع .. و خاطري منك ما طاب .. يا شين لحظــــ.....ـ ...