مغامرات فراشة الصيفية -2-ـ

مع تزايد وارتفاع درجات الحرارة وانقراض الناس والنشاطات، واقتراب عودة المغتربين إلى ديار الغربة ,, تنشأ علاقة طردية بين انقراض الناس وانقراض النشاطات .. لذا اقترحت فراشة على صديقاتها التجمع في بيتها .. واختيار مايحلو لهن من الأكل ليتم اعداده ..

المجموعة اللي اتصلت عليهم اهمه من النوع اللي نمون على بعض، يعني يمعاتنا تبدأ من الضحى إلى ما بعد العشا ,, بعد الاتصالات، قامت فراشة (على مضض) و وصّت الطباخة على الأكلات المقترحة.. و شددت عليها "هالله هالله بالشاي السنع و القهوة المهيلة" و طبعا الكيك والحلو شي ضروري .. طقوس السوالف المهمة والقعدة ..

فراشة تلبس دراعتها و تتزهلق قليلا تمشط القفة ليسترسل الشعر الأسود حريرياً، وليس لها خلقا تحط ميك اب .. قليل من الماسكرا والديرم الوردي :p

المهم .. تم تضبيط الجو و مبطلة السنترال من الصبح وامبخرة صالات السرداب كلها ..

تضع فراشة اللمسات الأخيرة .. وتختتم "التزهلق" بمسحتين من دهن عودها المفضل .. على أنغام شربل (هالأيام هابة فيه وايد) طوووووووووط الجرس الجرس .. بيييييييب بيييييييب الهرن الهرن

تركض فراشة .. بيييييب آخر يليه طوووووطاً آخرا وهكذا إلى أن اكتمل النصاب لتفتتح الجلسة..

حيّاكم الله .. هلا والله ، هلا عواشة "ممواه ممواه" اهلين هيونه .. هلا والله نورة .. ها وين الباجي؟

ما مداني اسأل ولا الصوت من عند الباب "يييه يه يه يه اشهالزين اشهالرييييحة اشهالسنع" واي واي واي كل هذا عشاني؟

هاهاهاي امويضي الله يغربل ابليسج هذي انتي؟ وآنا اقول وينهي. والله رايحة اييب التلفون عشان ادق وازفّج عبالي معالي الوزيرة راح تعتذر كالعادة

لا لا لااا اكييييد ياية سمعت انا مسويين كريم كراميل.. آآآنا مينونة اطوف كريم كراميل بيتكم؟؟؟؟؟

ايا الللللل هاهاهاها ياييه عشان الكريم كراميل هاااا؟ زين قلتيلي عشان بالذات انتي الوحيدة اللي ماحطلها ..

لا لا لا حشا مو يايه عشان الكريم كراميل بسس

بعد عمري والله –عندما تهم فراشة بلم امويضي- مو يايه عشان الكريم كراميل بس .. عشان البشاميل وسلطة الجرجير و الرمان و الباستا والديا...خل انحاش واقعد مع باجي البنات قبل لا تحوشني زفة ثانية .. هاهاها

همممم منو ناقص بعد؟؟ فراشة تفكر "نورةـ امويضي-عواش-هيون.." وبنص التفكير تهل باقي البنات

مها، زينو، عواش الثانية، احصيص (حصة)

يتجمع الكل و تبدأ الهذرة و فراشة تعد العصائر الطازجة لكل وحدة من صديقاتها حسب تفضيل كل وحدة..

(مويضي): فرّوش – اشهالأغاني الطربية الأصيلة .. حدج داثرة لي درجة اني ماعرفت ولا اغنية من اللي حاطتهم لي الحين تدرين؟

حصون: شعرفج انتاي؟ اقول اقول اهوووو ييباي الشسمة الريموت خل اروح اتعبث اشوف اشعندها رفيجتنا هالداثرة.

و تتعبث حصووون بالبلاي لست ويطلع لنا شرقي"ايووواااااا .. "

عواشة (التي تدينت بشدة بعد اختلاطها بشلة قامت بعمل القليل/أقصد الكثير من غسيل المخ) " بنات شنو اغاني و خرابيط و هز و شسمة .. بلا مصخرة، خل نقعد انسولف ، ترى ما ورا الأغاني غير تجميع السيئات وانتوا تدرون ان الحياة فانية وان ...

تحاول فراشة قطع الموضوع الذي بدا لها بأن له القابلية للاشتعال السريع مع كلمات امويضي الكيروسينية ..

امويضي: "حطيلنا صلصة و امرقة هذي، سوالفج فروّش"

شمرقته انتي بعد؟؟ بالج ويا الأكل لي الحين؟ اسمها سالسسسسا و مرينغيه ..

هذاهو اييي ورينا طولج يالله .. تقول حصّون انج خبرة

تحمرّ وجنتا فراشة و تتعمد "تضييع الصقلة" يالله بنات الغدا زاهب ..

الطاولات عامرة بأنواع السلطات والباستا و الملفوف والمحشي و التندوري تشكن اللي توها مجربة طريقتة فراشة .. و المشروبات .. مع الأكل نست البنات أنفسهن .. اللي تاكل واللي اتحلطم على المكالمة اللي يايتها واللي اتدج بهالملح عالأكل !! واللي مسوية رجيم واللي تخلط بيبسي مع سبرايتت!!

بعد الغداء – طخواّ البنات و صارت صخة –

هيونة (مولعة بالجنجفة) : بنااااات يالله يالله هند يالله قوموا بسكم قعدة ..

تقوم نورة وعواش -2#- و فروّش و امويضي و هيونه واحنا لاهين بالجنجفة – زينو تتعبث بالجهاز الدي في دي اليديد و عايشة تفر القنوات وامتابعة قناة المنار ..

تنزل لوليتا بصواني الحلو والقهوة العربية والشاي .. تترك فراشة أوراق الجنجفة لتأخذ منها بعض الصواني .. والبنات استيعابهم بطيء .. "بنات وحدة تيي تساعدني .."

وتنزل الصواني، وتجابل موضي مطارة القهوة (مدمنة)/ وحصّون الشاي/ و فراشة الحلو و الصحون والقفاش والأدوات اللازمة للنجاب (القطع والتقديم)

اممممم يا حلو قهوتكم والله "عليج بالعافية, اقول امويضي شفيج امسوية احتكار حق القهوة صبي حق اللي يبي اول بعدين جابلي المطارة الثانية .. مسوينها حقّج ترا .." -- هاهاهاااااا اوكي اوكي سوري سوري

بعد ما طخوا مع الحلو والقهوة والشاي والجنجفة ، حدثتنا امويضي عن هوايتها اليديدة (الرسم) والمعارض اللي مشاركة فيها ، قرأت علينا عوّاش -#2- فصل من القصة اللي كتبتها هالشهر – والكل كان مندمج ..ورّتنا نورة جم لوحة راسمتها ومصورتها بموبايلها ..عايشة الأخرى تخبرنا عن التجمعات والدروس التي تحضرها – حصة عن دوامها والسوالف اللي تصير—و فراشة نست روحها واهيا تسمع مقطع من أغنية سرحت و شطّت بعييييييييداًً إلى أن انتبهوا لها

لأن فراشة من عادتها انها دايما متصدرة الجلسة وام السوالف والهذرة، فسكوتها كان مبعثاً للشك ..

ويييييي ، يا بختك يا حبييب الألب انجانك لقيت وحدة مثل فراشة تفكر فييييك .. ألوووووووو فراشووووو حوّل حوّل .. اللي واخد عألك

أي واخد عألي .. ألووو انتاي ..

يمه منه هذا اللي ماخذ عقلج وماخذ هذرتج وبالج ومخليج محلوّة هالكثر ..

يا شقوووول حتى الكريم كراميل مي قادرة تصك حلجج؟؟ هاهاها اي حبيب الب اي بطيييخ.. يا معودة بسس ، قاعدة أفكر من وين ياية ريحة الدخان اخاف شي محترق ..

لاااا والله؟ ودي اصدقج حبيبتي انتاي .. الظاهر الدخان هذا اللي تشمينه طالع من مخج من كثر التفكيييير هاهاها

حصة تقفز لتشارك بالحديث "اااانا جني اسمع ان السالفة فيها حبيب الب و دخان، السالفة حامية شكلها ... قوليييلي حلوووو؟؟؟؟؟" وآنننااا اقوووول شو هالحلااا اييييي و شو هالسنع و شو هااالللللل

تعصب فراشة "وبعدييين معاكم؟؟ ههههههه جم مرة أقوللكم اني رفضت ذاك الفرنسي اللي ذبحني وهوا يقول اي لوووف ارابيان وومان فيري بيوووتيفول فييري اتراكتييف "

(مويضي): هاهاهاها اييي ايي اذّكره، شخباري .. عاد كان حاط عينه عليج من زمان .. قلنا جود تاخذينه تحسنين النسل العربي وتييبييلنا فرنسيين مجكنميين . وااايي كيووووت ، اتخيلج بالسوق ترطنين وياه بالفرنسي و ..

(فراشة): اقووول، شكلج وايد عشتي الدور، فراغة آخذلي فرنسي ماكو شغل ها؟ عشان ابوي يقضّبني باب بيتنا ، وبعدين وين أفهمه الشعر اللي اكتبه، ولا اذا بقولله نكتة عن مطيري ولا عازمي شلون راح يفهم بالله؟ لا لا مو شي كلّش ..

(حصونة): "هاهاهاااا اهم الشي النكت، اذا جابلني مزيون فرنسي شابي آنا بالنكت وقتها .. وليش شعر .. غنيله جو سوي فاتيغي جو سوي مالاادوو اتأدّي الدور والغرض و يفهمها اهوا عالطاير "

(فراشة): "هاهاهااااا الله يخسكم ماني قادرة امسك روحي من الضحك .. لا لا مابي اغنيلة جو سوي ولا اكل كرواسون كليوم ولا واحد يتمييع بالحجي . ماحب جذي .. آنا مواصفات فارس أحلامي غييييييير .."

(مويضي): "اسسماالللله .. اشلون غير بالله؟؟

أنا اقوللج شلون ..

تتجمع هنا البنات أكثر لأنه الموضوع الأكثر حساسية كلما تجمعنا، صغرت الدائرة وشاركتنا عوّاشة الحديث .. حيث بدأته امويضي عن المواصفات التي تحلم فيها . والبنات كلُّ بانتظار دورهن لتقول كل واحدة المواصفات التي تحلم فيها ..

آنا راح اتوقف هني لأن البوست صار طويييييييل ومابي اطول عليكم .. زبدة الحديث.. ماهي المواصفات التي تحلم /تحلمين بها في الشخص الذي تود/ تودين الارتباط به .. وهالسؤال مفتوح للمتزوجين والعازبين (من كلا الجنسين) ماعندنا تفرقة اهنيييه .. والصفات تتفرّع لتشمل الشكل والطباع و و و .. اتركها مفتوحة لكم .. إلى أن نراكم في الحلقة الثانية .. وعسى ما طولت عليكم؟ عشان اذا جذي احاول اقصر البوست المرة الياية اذا قدرت.

-----------------------------------------------------------------------------

هالغنيتين لاصقين بمخي صارلهم 4 أيام وداشة الخامس بكرة ,, بس لاعت جبدي .. اهداء إلى اللي قروا و تويتي بوجه خاص (شعليج اهداء خاص بعد)ـ

.

مزاج الليلة #2

مزاج الليلة #1