Me and Music

ما حسيت ان الموسيقى مهمة بحياتي الا لما ضاع الـ "آي بود"ـ

لاحظت اني اسمع موسيقى تقريبا أغلب الوقت، لما أنظف الشقة، لما آخذ شاور، لما ينزل علي الوحي وأسشور شعري، لما أقرر إني أطبخ.. وكل مكان له مزاجه وأغانيه الخاصة..

Shower play list, cooking play list, reading play list, cleaning play list.. etc :p

اليوم قعدت أفكر .. طرت على بالي مسألة " النضج الموسيقي" والتأثير اللي حصل لي على مدى السنوات الأخيرة لما بديت أهتم بشنو أسمع.

رجعت بذاكرتي إلى الوراء شوية ..

قبل ما أروح أمريكا..

أبوي.. معاه تذوقت الطرب الأصيل. كنا نقعد ساعات آنا واهوا بالسرداب يسمعني أم كلثوم ـ عقب ما يضبّط قهوته التركية (وسط،مع وش) وينزّل معاه كاكاو سنع شغل مزاج. آنا أمزّج عالكاكاو واهو يمزج عالقهوة. قبل لا نشغلها يقوللي مقاطعه المفضلة والكلمات.لما يشغل الموسيقى نقعد ساعات نسمع.. يخليني أحس بكل كوبليه بروح، بكل تحويلة بكل شي.

كنت أطفر و بسرعة أملّ.. ما كنت أحب أسمعها، صوتها كان ينرفزني و الأغاني كنت أحسها طويلة. لما شوي شوي
بديت بروحي أحس .. أتذوق .. أسمع .. نتيجة هالقعدات خلتني أطلع باغنيتين حبيتهم منّه : "بعيد عنك" ـ "أنت عمري-كانت هذي بدايتي" ـ و "عودت عيني" ـ و أغنية نسيت أسمها بس فيها مقطع يتلخص معناه بأن لو رجعت بالوقت تاني ماحب غيرك أحبك انتا.. يا سلااام

علمني معنى الطرب الأصيل.. منو أم كلثوم و منو عبدالوهاب.. يحب يسمع العود والقانون أكثر شي..
هذا مزاج السرداب بالمساء.. بالأوقات العادية كنت أسمع وياه أبوبكر سالم، محمد المسباح، ارويشد، اغنية وحدة من أغاني شيرين (هذي اشلون مادري لا تسألوني) بس كانت حلوة. و أغنية"الأماكن" مالت محمد عبده بس ما يحبه ولا يحب أغانيه، شلون حب هاذي بالذات و بس مادري.

انيي حق الماما، اللي كلها رومانسية واحساس مرهف.. نقعد بالصالة آنا وياها حزة العصاري مع الشاي والكيك ـ العادة التلفزيون كله عالأخبار، بس تدش مزاج تقول جملتها المشهورة "حطيلنا شي يغني" .. هاهاها مرات أضحك على هالجملة بيني و بينها و أطفرها فيها ساعات .. لأن اذا حطينا شي يغني مايعجبها اغاني هالأيام.

مع أمي حبيت أغاني وردة الجزائرية القديمة، ماجدة الرومي، "محمد عبده" وااااااااااايد تحب أغانيه القديمة (آنا ما أدانيه) ، أغاني عبدالكريم المغبرة، فيروز (عندها كرتون أشرطة أيام الجامعة)
Lionel Richie, 80s Classics

وكل ما أرجع الكويت اجازة تعلق اغنية معانا نعلق عليها كل ما رحنا مشاويرنا ويا بعض، كل ما قعدنا نسولف بغرفتي بالليل اشغلها بالباكراوند كل ما تحرشت فيها دندنت هالأغنية.. و يصير كل ما وحدة منا تسمع الأغنية نتذكر بعض و نطيحله دموع عبر الأثير.

التناتيف الباجية، بنت خالتي حببتني اب "ذ جيبيسز" ، جلوريا ستيفان. أخوي ماكو ذوق بالأغاني صفر، عار على العايلة، يسمع روك و ميتال و هالخرابيط.

حب حياتي "أندريا بوتشيللي" عرفته بالصدفة من التلفزيون. من أسمعه انسى كل شي. ولما أسوي باستا لاااازم أشغله.

باختصار هذا تاريخي الموسيقي والترانزشن اللي صار على مر السنين
والحلو بالأغاني انها دايما تحمل ذكرى معينة .. ذكرى شخص معين.. احساس معين.. حادثة
او حتى phase

and personally, I think that taste in music can tell a lot about a person.