فاصل إعلاني و نعود إليكم -test version

كان يا مكان..


في يوم من أيام الصيف الحارقة، ومنذ زمن بعيد ، كانت فراشة في نزق الطفولة تتمشى مع أخيها وتلعب عالبحر ..طبعاً لعبتها المفضلة من زمان "بناء البيوت الرملية" ومحاولة الحفاظ عليها أكبر مدة ممكنة. ولكن "يتليعن" الأخ لاعباً دور الأخ الشرّي ويقوم بتهديم بيوت أحلامها..

المهم..

طول عمري وآنا أحب الكتابة، التلوين، التشخبط... باختصار -أي شي له علاقة بورقة وقلم- لي درجة إني لما كبرت تالي ـ البنات امسطرين الحمر والماسكرا بجناطهم وآنا الدفتر والقلم مرتزّين بالجنطة بدال الحمرة. عاد ذاك اليوم واحنا انتمشى عاليال (أيام الطفولة والصبا) قاعدة عالرمل وأطلّع الدفتر والقلم مادري شاشخبط وشاكتب .. لما طرت على بالي فكرة عبيطة أعجبتني ذاك الوقت.. ابسسسسسرعة أطلع القلم وأهم بالكتابة :

(مو بالضبط هذا المكتوب بس قريب من الفكرة)ـ



بسم الله الرحمن الرحيم

كتبت هذه الرسالة يوم .. الموافق .. الساعة ..في المكان الفلاني
(احتوت هذه المساحة على موضوع كان يعبر عن مزاجي في ذلك اليوم، ماذكر شنو اللي انكتب بالضبط عاد)ـ
"والذي يجدها" يرسل رداًّ عليها على العنوان البريدي التالي:
ص.ب 0000
12345 الصفاة
دولة الكويت
أو ينشرها على الجريدة المحلية
وشكراً

الويه الثاني كتبتها بالانجليزي (والله فراغة) بس هم فطينة والله آنذاك الوقت يعني .. المهم سفطتها على شكل اسطواني ،يبت بطل فاضي ثقيل شوي، دعستها داخل وأحكمت إغلاقه .. مشيت ليما المسنة اللي داخل البحر وخلّيت أبوي يساعدني يحذفها ابعييييييييييييييد.. تالي تذكرت جني غلطت بالعنوان

عاد كله أفكر .. ياترى وين اوصلت؟؟ منو لقاها وشنو سووا فيها؟؟ .. عاد تخيلوا مرة تلقون رسالة ببطل مثل مالتي .. شتسوون فيها؟

-------------------------------------------------


كلمة السّر..


لاحظت في كثير من الأحيان أن هناك بعض الكلمات التي تحمل مفعول السحر على الناس ..خصوصاً المقرّبين .. وهذه الكلمات إما أن تكون كلمة دلع ..أو كلمة خاصة بين الشخص واللي جدامه..

عاد آنا عندي كلمة السر حق معظم اللي بالبيت .. ولا أنكر أن هناك كلمة إن نوديت بها .. وفي حالة معينة .. تعمل عمل العجاب .. لها مفعولاً مو بس سحرياً ..

أحد عنده كلمة سر بعد؟؟
------------------------------------------------

عطره الذي اخترق حواسي ..


العطور أو الرائحة كثيراً ما ترتبط لدي بمكان .. وإذا صادف أن تكون أول مرة أشمها على شخص خلاص!! كل ما أشمها ترتبط بهالشخص ..

أتذكر كل ما ييت أحب أمي أو ألمها .. مرات لما أسشور لها شعرها.. اتييني ريحة دهن العود اللي تنسييييني تخلييييني أفقد .. بس أبي أغوص برقبتها .. عاد قبل لا أسافر واحنا انصك الجناط دار بيننا الحوار التالي:

أمي: فرووشة .. في شي تبين اتحطينه قبل لا انصك الجنطة؟
فراشة وقد اكتستها حمرة الفشلة :اممممم اي والله ..حاطة عيني على دهن العود مالج ..
أمي: بسسسس؟؟ ما يغلى عليج .. خلاص من باجر الصبح اييبلج واحد .
فراشة: لا لا مابي ، ابيييييه اهوا اللي اتحطين منه، هذا الحجال اللي باقي فيه ميخالف

يوووووم وصلنا المطار ولا تدعس الغرشة بالهاند باق..

عاد مرة داقة علي ومع السوالف اتقوللي اشطاري عليج هالمرّة دهن عود؟؟ وليش ما خليتيني أعطيج غرشة ثانية هم حلوة!!؟
يوم قلتلها السبب الرئيسي.. آنا ما أحطها إلا لسبب واحد .. أحطها عشان اشمج وين مارحت .. اهني عاد اخنقتها العبرة وحسيت بعيونها اتغورق -عبر الأثيرـ

-----------------------------------------------------

جولاتي الكتبية ..


ثلاث روايات خلصتهم وأعجبوني:

* كل شيء على ما يرام -هديـــــــة حسين
*ســــــمر كلمــــــــــات -طـــالب الرفاعي
*رائـــــــــــحة البحـــــر-طــــالب الرفاعي

وحالياً قاعدة أقرا (فوضى الحــــواس) -أحلام مستغانمي : عليها أسلوب جرفني بفن و نعومة إلى عالم إدمان الجمل والكلمات الراقية .. باختصار .. روعـــــــــــــــــــــــــــــــة ..ـ

-------------------------------------------------

متفرقات .. هذيان آخر الليل .. ومسك الختام

* The paper cut between my first two fingers is killing me .. Damn them paper cuts

* I'm craving fine dark chocolate .. I ran out of them, so I'm eating a "Tola" chocolate instead

* Why is everyone asleep and I'm the only one awake .. This feeling makes me feel sick


* Weddi ashooof filim hindiiii

-------------------------------------------------